Numri i të punësuarve në industrinë e Maqedonisë së Veriut u ul me 2,9% në shtator 2026 krahasuar me të njëjtin muaj të vitit të kaluar, sipas të dhënave të Entit Shtetëror të Statistikës.
Rënia më e madhe vjetore u regjistrua në sektorin e nxjerrjes së mineraleve dhe shfrytëzimit të guroreve, ku numri i të punësuarve u zvogëlua me 7,6%. Industria përpunuese, e cila zë pjesën më të madhe të aktivitetit industrial, shënoi një rënie prej 2,9%. Ndërkohë, sektori i furnizimit me energji elektrike, gaz, avull dhe ajër të kondicionuar ishte i vetmi sektor kryesor industrial që regjistroi rritje, me 1,5% më shumë të punësuar.
Punësimi ra edhe në të gjitha grupet kryesore industriale. Numri i punonjësve në prodhimin e mallrave të konsumit jo të qëndrueshëm u ul me 4,5%, ndërsa prodhimi i mallrave kapitale dhe i mallrave ndërmjetëse, duke përjashtuar energjinë, regjistruan secili rënie prej 2,7%. Punësimi në prodhimin e mallrave të konsumit të qëndrueshëm ra me 1,7%, ndërsa në grupin e energjisë rënia ishte 1,6%.
Prirja rënëse pasqyrohet edhe në të dhënat e përgjithshme për këtë vit. Sipas Entit Shtetëror të Statistikës, gjatë periudhës janar–shtator 2026, numri i të punësuarve në industrinë e Maqedonisë së Veriut u ul me 2,8% krahasuar me të njëjtën periudhë të vitit 2025.
