Nga 3 deri më 6 korrik, EXIT do të mbahet për herë të parë në Mal të Zi, ku Plazhi i Madh në Ulqin do të shndërrohet në një nga skenat më të mëdha muzikore në rajon. Organizatorët presin mijëra vizitorë nga Evropa, duke i dhënë një shtysë të re sezonit turistik.
Në program janë emra të njohur të skenës ndërkombëtare të muzikës elektronike si Jamie Jones, Maceo Plex, Monolink, Argy, Stephan Bodzin (live), Awen, Deer Jade dhe Space Motion.
Organizatorët kanë zgjedhur artistë që konsiderohen ndër më të vlerësuarit në skenën house dhe techno.
I themeluar në Novi Sad në vitin 2000, EXIT është bërë një nga festivalet muzikore më të njohura në Evropë. Mbërritja e tij në Mal të Zi pritet të forcojë ofertën turistike të vendit dhe të promovojë Ulqinin si një destinacion të rëndësishëm veror.
