Една од најпрепознатливите македонски претприемачки и бизнис-лидери, Нина Ангеловска Станков, ја објави својата прва книга „Ништо случајно“, во која нуди лично сведоштво за искуствата, одлуките и предизвиците што го обликувале нејзиниот пат од стартап основач до министерка за финансии.
Издадена од Издавачкиот центар ТРИ, книгата го носи поднасловот „Кога подготвеноста ги среќава предизвиците“ и претставува првпат Ангеловска Станков отворено да проговори за приказната зад нејзиниот јавен успех.
Во книгата таа пишува за градењето на бизнис од нула, развојот на е-трговијата во Македонија, лидерските предизвици и носењето одлуки на највисоко државно ниво. Покрај професионалните достигнувања, таа се осврнува и на личните дилеми, мајчинството, неочекуваните пресврти и животните лекции кои останале надвор од очите на јавноста.
„Никогаш не мислев дека ќе напишам книга. Исто како што никогаш не мислев дека ќе основам компанија, ќе станам министерка или дека ќе направам егзит. Но ништо од тоа не беше по случајност“, изјави Ангеловска Станков по повод објавувањето на книгата.
Книгата е наменета за широка публика – од претприемачи и менаџери до сите оние кои бараат инспиративна приказна за амбицијата, истрајноста и личниот развој.
Ангеловска Станков е коосновач на Групер, еден од најуспешните македонски стартапи и пионер во домашната е-трговија. Подоцна стана првата жена министер за финансии во Македонија, а за својата работа и влијание доби бројни меѓународни признанија, меѓу кои и место на листата Forbes 30 Under 30.
Книгата беше објавена во мај, а за време на претпродажбата читателите имаа можност да обезбедат примероци со потпис и посвета од авторката.
