Ndërsa Mali i Zi feston sonte dy dekada nga rikthimi i pavarësisë, Podgorica do të jetë skena e një koncerti që pak kush do ta kishte imagjinuar në rajon vite më parë. Në Sheshin e Pavarësisë do të performojë ylli botëror i muzikës Ricky Martin, në kuadër të programit qendror të jubileut që Qeveria e Malit të Zi e përshkruan si një nga ngjarjet muzikore më të rëndësishme në historinë moderne të vendit.
Para koncertit, Martin tha se edhe para ftesës për të performuar, ai kishte dëgjuar për bukuritë natyrore të Malit të Zi dhe mikpritjen e njerëzve të tij.
“Ka diçka të veçantë kur performon për herë të parë në një vend,” tha Martin, duke shtuar se momente të tilla mbeten emocionuese edhe pas dekadash karriere.
Ai tha se dëshiron t’i lërë publikut “një natë gëzimi, lidhjeje dhe feste”.
“Muzika ka fuqinë të na bashkojë përtej gjuhës dhe gjeografisë,” tha Martin. “Dua që të gjithë të largohen me energji, frymëzim dhe dashuri.”
Për Malin e Zi, simbolika e kësaj mbrëmjeje shkon përtej muzikës. Koncerti zhvillohet në një moment kur shteti dëshiron ta paraqesë 20-vjetorin e pavarësisë jo vetëm si një jubile politik, por edhe si një mesazh hapjeje, vetëbesimi dhe dukshmërie ndërkombëtare.
Në deklaratën e publikuar në faqen zyrtare të Qeverisë së Malit të Zi në Facebook, organizatorët e përshkruan koncertin si “dhuratë e shtetit për qytetarët”, ndërsa ardhja e Ricky Martin u prezantua si dëshmi e ambicies për ta shënuar jubileun në nivel global.
“Prania e tij i jep një dimension shtesë festës dhe e pozicionon Malin e Zi si një pikë takimi të artit dhe kulturës së nivelit të lartë”, thuhet në deklaratë.
Martin foli edhe për faktin se muzika e tij sot po fiton një audiencë krejtësisht të re, përfshirë breza që nuk kishin lindur ende kur hitet e tij më të mëdha u publikuan për herë të parë.
“Është një nga dhuratat më të mëdha që një artist mund të marrë,” tha ai. “Këngët vazhdojnë të gjejnë publik të ri në mënyra që nuk do t’i kisha imagjinuar kurrë.”
Ai shtoi se rrjetet sociale dhe TikTok-u u kanë dhënë këngëve një jetë të re dhe se është emocionuese të shohë brezat e rinj t’i përqafojnë ato me të njëjtin pasion si prindërit e tyre.
Duke folur për publikun në Ballkan, Martin tha se ka dëgjuar shumë për energjinë dhe emocionet e koncerteve në rajon dhe se pret një atmosferë të fuqishme në Podgoricë.
“Kur publiku jeton plotësisht momentin, krijohet diçka shumë e fortë mes artistit dhe njerëzve,” tha ai.
Sonte, Mali i Zi shpreson që ajo energji të ndihet shumë përtej Sheshit të Pavarësisë.
