Словенија разгледува можност за унапредување на договорот со Светата Столица од 2001 година, со кој се уредуваат односите меѓу Црквата и државата, изјави премиерот Јанез Јанша по средбата со папата Лав XIV во Ватикан.
Јанша рече дека постојниот договор претставува цврста основа за односите со Ватикан, но дека искуството низ годините покажало потреба во неговите рамки да се решат уште неколку прашања. Според него, нивното вклучување во договорот би можело да обезбеди поголем континуитет, наместо поединечни влади одделно да ги менуваат постојните аранжмани. Министерот за надворешни работи Тоне Кајзер уште во септември потврдил дека владата настојува да го прошири договорот. Меѓу прашањата за кои се разговара е и можното формирање воен ординаријат, кој би обезбедувал посебна пасторална грижа за припадниците на Словенечките вооружени сили и полицијата.
Ватикан со години се залага за негово формирање, додека духовна грижа веќе е достапна во словенечката армија. Сакралното наследство е уште една област што би можела да биде опфатена со дополнителни договори.
За време на посетата на Ватикан, Јанша му се заблагодари и на папата Лав XIV за неговите мировни напори и моралното водство во услови на глобални безбедносни предизвици. Тој изрази благодарност и за помошта на Светата Столица во враќањето на сакрални уметнички дела однесени од словенечките цркви за време на Втората светска војна, меѓу кои и олтарна слика од венецијанскиот ренесансен уметник Виторе Карпачо. Посетата вклучуваше и средби со високи ватикански претставници, по што Јанша отпатува за Рим на средба со италијанската премиерка Џорџа Мелони.
