Филмот „Ветре, зборувај со мене“ („Vjetre, pričaj sa mnom“), копродукција на Србија, Словенија и Хрватска, беше прогласен за најдобар филм на доделувањето на наградите АФА, одржано во саботата вечерта во Порто Монтенегро. Остварувањето на режисерот Стефан Ѓорѓевиќ, во продукција на Драгана Јововиќ, освои уште две награди – за најдобра режија и најдобар дебитантски филм.
Наградата за најдобра главна актерка ја доби Нуми Рапас за улогата во филмот „Мајка“ на режисерката Теона Стругар Митевска, додека Андрија Кузмановиќ беше прогласен за најдобар главен актер за улогата во филмот „Југо Флорида“ на Владимир Тагиќ. Признанието за ѕвезда во подем му припадна на Ариф Јакуп за филмот „Диџеј Ахмет“ на Георги М. Унковски, а Хана Јушиќ ја освои наградата за најдобро сценарио за филмот „Бог нема да помогне“.
Босанско-херцеговската серија „Котлина“, чии автори се Амра Бакшиќ Чамо и Данис Тановиќ, ја освои наградата за најдобра телевизиска серија. Снежана Видовиќ и Феѓа Штукан беа наградени за најдобри главни улоги, со што серијата освои вкупно три признанија.
Годинава за првпат беше доделена и награда за исклучителен успех во кинодистрибуцијата, која му припадна на филмот „Свадба“ на режисерот Игор Шереги, за највисок приход остварен на киноблагајните.
За номинациите и добитниците одлучуваа повеќе од 800 членови на Филмската и ТВ академија на Јадранскиот регион, која обединува филмски и телевизиски професионалци. Меѓу фестивалите основачи на Академијата се Сараевскиот филмски фестивал, Загрепскиот филмски фестивал и Фестивалот на авторски филм од Белград.
Свеченоста во Црна Гора собра претставници на регионалната филмска и телевизиска индустрија, истакнувајќи го значењето на соработката и заедничките продукции меѓу земјите од регионот.
