Самитот MED9 се одржува во Сплит на 6 и 7 октомври и ги собира лидерите на девет јужни земји членки на ЕУ, како и високи европски и меѓународни претставници.
Групата MED9 ја сочинуваат Хрватска, Кипар, Франција, Грција, Италија, Малта, Португалија, Словенија и Шпанија. На самитот се очекува да присуствуваат и претседателката на Европската комисија Урсула фон дер Лајен, претседателот на Европскиот совет Антонио Кошта и европската комесарка за Медитеранот Дубравка Шуица, како и принцот Алберт II од Монако и јорданскиот престолонаследник Ал Хусеин бин Абдула II.
Разговорите ќе бидат насочени кон приоритетите на хрватското претседавање со MED9: создавање побезбеден, поодржлив и поотпорен Медитеран.
На агендата се безбедноста и миграцијата, енергетиката, заштитата на животната средина и управувањето со водите, демографските предизвици, земјоделството, правосудството, вештачката интелигенција и внатрешните работи, како и односите со јужното соседство на ЕУ и спроведувањето на Пактот за Медитеранот.
Самитот ќе им овозможи и на деветте земји да ги усогласат своите позиции пред претстојниот состанок на Европскиот совет, а се очекува разговорите да опфатат и пошироки прашања на ЕУ, вклучувајќи ја следната повеќегодишна финансиска рамка, проширувањето, конкурентноста, одбраната и ситуацијата во Украина. Програмата на 7 октомври ќе опфати две работни сесии и работен ручек посветен на отпорноста на Медитеранот, одржливиот развој и геополитичките и геоекономските перспективи на Блискиот Исток, по што ќе следува заедничка прес-конференција.
