Подгорица и Ријад ќе бидат поврзани со директни сезонски летови од 25 јуни до 29 септември, што претставува нов чекор во зајакнувањето на туристичката и деловната поврзаност меѓу Црна Гора и Саудиска Арабија.
Летовите меѓу главниот град на Црна Гора и саудиската престолнина ќе се реализираат трипати неделно: во вторник, четврток и сабота, во текот на летната сезона.
Воведувањето на новата линија се очекува дополнително да го зголеми бројот на посетители од земјите од Заливот кои патуваат во Црна Гора, како и да отвори нови можности за деловни патувања, инвестиции и регионална поврзаност во текот на туристичката сезона.
Новата авионска врска доаѓа во период на зајакнување на економските и туристичките односи меѓу двете земји, додека Црна Гора сè повеќе се позиционира како атрактивна медитеранска дестинација за патници и инвеститори од Блискиот Исток.
