За нејзиниот избор гласаа 81 пратеник, откако премиерот Албин Курти ја предложи за кандидатка доцна вечерта на 6 октомври. Заклетвата ја положи непосредно по полноќ, само неколку минути по истекот на рокот утврден од Уставниот суд.
Широка Пула е економистка и универзитетска професорка, која од 2025 година раководи со Академијата на науките и уметностите на Косово*. Родена е во Приштина во 1953 година, а дипломирала на Економскиот факултет при Универзитетот во Приштина. Постдипломските студии од областа на теоријата на економскиот развој ги завршила на Универзитетот во Загреб. Докторирала на Универзитетот во Приштина, а постдокторски студии посетувала во Австрија и Соединетите Американски Држави.
Нејзината кариера ги опфаќа академската работа, јавните функции и политиката. Работела во Народната банка на Косово*, а подоцна извршувала високи функции во Академијата на науките и уметностите.
Од 2008 до 2011 година била министерка за енергетика и рударство во владата на Хашим Тачи, додека од 2011 до 2014 година била пратеничка од Демократската партија на Косово* (PDK). Има искуство и во соработката со невладини организации посветени на зајакнувањето на положбата на жените, родовата еднаквост, бизнисот и претприемништвото.
Во своето прво обраќање како претседателка, Широка Пула изјави дека ќе биде претседателка на сите граѓани и вети дека ќе работи на единството, правдата, развојот и зајакнувањето на институциите. Таа ја нагласи и евроатлантската ориентација. Нејзиниот избор следуваше по политички договор меѓу Движењето Самоопределување на Курти и PDK, кој вклучуваше и измени на законот што ја регулира работата на Специјализираните совети на Косово*. Собранието ги усвои измените на одделно гласање истата вечер.
