Албанија е составен дел од европската безбедносна архитектура и има одговорност да придонесе во справувањето со заканите што ги надминуваат националните граници, изјави министерот за внатрешни работи Ервин Демо на конференцијата.
„Албанија не е задниот двор на Европа. Ние сме дел од нејзината влезна врата. Таа врата мора да биде безбедна“, рече Демо, нагласувајќи дека безбедноста на Албанија е неразделна од безбедноста на поширокиот европски континент. Според него, новите предизвици, меѓу кои организираниот криминал, нелегалната трговија, сајбер-заканите и новите облици на криминални активности, бараат посилни институции, побрза размена на информации, подобри технолошки капацитети и координирани прекугранични операции.
Осврнувајќи се на Извештајот на Европската комисија за Албанија за 2026 година, министерот го истакна напредокот во соработката со земјите членки на ЕУ и европските агенции, зголемениот број операции против дрогата, заедничките патроли и напорите за следење на имотот стекнат со криминал. Тој укажа и на подобрувањето на капацитетите на земјата за борба против сајбер-криминалот и зајакнување на меѓународната соработка. Сепак, призна дека е потребен натамошен напредок во финансиските истраги, како и во кривичното гонење и обезбедувањето осудителни пресуди за финансиски кривични дела, вклучително и дела поврзани со сајбер-криминалот, нелегалната трговија и незаконското поседување огнено оружје.
Беше нагласена и важноста од унапредување на техничките капацитети за анализа на дигитални докази и заштита на критичната инфраструктура. Демо се осврна на минатонеделната средба на министрите за внатрешни работи од регионот во Будва, на која се разговараше за заштитата на децата на интернет, интернет-измамите, криумчарењето мигранти и спроведувањето на Пактот на ЕУ за миграција и азил, во соработка со Фронтекс, Агенцијата на Европската Унија за азил (EUAA) и Европол.
На конференцијата во Тирана беа претставени и прелиминарните наоди од регионалното истражување „Secure Meter 2026“, кое ги испитува перцепциите на граѓаните за безбедноста и нивото на доверба низ регионот. Веродостојните податоци и докази беа посочени како клучни за креирање ефективни безбедносни политики и утврдување на областите во кои е потребно посилно институционално дејствување. Демо дополнително го истакна стратешкото значење на Безбедносното партнерство меѓу ЕУ и Западен Балкан, нагласувајќи дека безбедноста на двете страни на Јадранот е меѓусебно поврзана.
На крајот беше заклучено дека регионалната безбедносна соработка не е само приоритет, туку и предуслов за економски развој, инвестиции и напредок кон европската интеграција.
